Rusiyanın “Sibir” şirkəti Bakıda mikromobil nəqliyyat layihəsini həyata keçirir. Bu barədə şirkətin direktoru Ramil Əliyev Trend-ə məlumat verib.
Onun sözlərinə görə, Bakı Şəhər İcra Hakimiyyəti artıq “Sibir” şirkətinə elektrik skuterlərin icarə məntəqələri üçün ərazi ayırıb.
“Biz müşahidə edirik ki, insanlar bir nöqtədən digər nöqtəyə hərəkət etmək üçün bu nəqliyyat növündən fəal istifadə etməyə başlayıblar. Layihə yekunlaşdıqdan sonra paytaxt sakinləri skuter icarəyə götürə biləcək və onu çatdıqları məntəqədə qoya biləcəklər”, - deyə Ramil Əliyev bildirib.
Şirkət direktoru vurğulayıb ki, bu layihənin icrası Bakıda tıxacların azalmasına, həmçinin təmiz nəqliyyatın sayının artmasına səbəb olacaq: “Bakı İcra Hakimiyyətinin nümayəndələri ilə danışıqlar aparmışıq və şəhərin növbəti 20 il üçün inkişaf planı ilə tanış olmuşuq. Plan çərçivəsində bulvar boyu və Bakının mərkəzində dairəvi yolun çəkilməsi nəzərdə tutulub. Dairəvi yolda velosiped yolu da olacaq”.
