Azərbaycanın sambo üzrə millisi bu il aprelin 21-23-də Novi Sad şəhərində keçiriləcək gənclər arasında Avropa çempionatında 15 idmançı ilə təmsil olunacaq.
Yeniyetmələrdən ibarət cüdo millisinin baş məşqçisi Yaqub Abdullayevin İdman.Biz-ə verdiyi məlumata görə, komandanın heyətində ötən il Azərbaycan Cüdo Federasiyası tərəfindən intizam qaydalarını pozduğuna görə 10 il müddətinə diskvalifikasiya olunmuş sabiq cüdoçu, yeniyetmələr və gənclər arasında beynəlxalq turnirlərin dəfələrlə qalibi və mükafatçısı Tuncay Şamil də yer alacaq.
“Serbiyaya yollanan 15 idmançı arasında 20 yaşlı Tuncay Şamil də var. O, komandamızı 98 kq çəki dərəcəsində təmsil edəcək. Tuncay bu səfərə nəticələri ilə layiq görülüb – o, yeniyetmələr arasında ölkə çempionu olub və böyüklər arasında keçirilən birincilikdə üçüncü yeri tutub. Hazırda əla formadadır və Avropa çempionu adına əsas ümidlərimizdən biridir”, - deyə Yaqub Abdullayev bildirib.
