Daşkəsən rayonunda yerləşən Çovdar qızıl mədəni ərazisində keçirilən tikinti-quraşdırma işləri zamanı arxeoloji mədəniyyət qalıqları aşkarlanıb. Bu barədə “AzerGold” QSC dekabrın 1-də məlumat verib.
Məlumata əsasən, ərazidə Xocalı-Gədəbəy mədəniyyətinə aid Son tunc-Erkən dəmir dövrünün 58 daş qutu qəbri tapılıb.
Qəbirlərdə insan sümükləri ilə yanaşı, xəncər, nizə, toppuz, bilərzik, sırğa, kəmər, muncuq, silah, Misirdən gətirilmiş mavi pasta muncuqları, Hind okeanı üçün xarakterik olan kaurilər və digər əşyalar aşkarlanıb.
Təhlillər nəticəsində regiondakı qədim tayfalar haqqında məlumat əldə ediləcək.
Hazırda arxeoloji abidənin araşdırılması məqsədilə ərazidə “AzerGold” tərəfindən aparılan işlər dayandırılıb.
Daha öncə, 2019-cu ildə Çovdar qızıl mədənində qazıntılar zamanı 156 qəbir və 6 000-dən çox eksponat tapılmışdır.
