“Həyat, deyəsən gözəldir” (Fəryad-2) bədii filminin çəkilişləri sona çatıb. Bu barədə "Azərbaycanfilm" kinostudiyası oktyabrın 6-da Report-a xəbər verib.
Filmin çəkilişləri Xocavənd rayonunun Hadrut qəsəbəsində, Xızı rayonunda, Bakıda və Abşeron yarımadasında “Azərbaycanfilm” kinostudiyası tərəfindən iki ay aparılıb.
“Həyat, deyəsən gözəldir” filminin rejissoru Xalq artisti Vaqif Mustafayevdir.
Süjetdə Azərbaycanın 44 günlük Vətən müharibəsindəki zəfəri əks etdirilib. Əsir alınan erməni əsgərləri arasında olan iki qardaşın aqibəti barəsində bəhs edilib.
“Fəryad-1” filmi 1993-cü ildə çəkilmişdir. Süjetdə Qarabağ müharibəsində döyüşən əsgərlərdən birinin əsirlikdə başına gətirilənlərdən bəhs edilib. Film bir sıra mükafatlara layiq görulüb.
