Helikopter qəzasında şəhid olanların ailələrinə və yaralanan hərbçilərə 550 manatdan 11 min manatadək kompensasiya ödəniləcək. Bu barədə dekabrın 6-da Azərbaycan Sığortaçılar Assosiasiyasının icraçı direktoru Elmar Mirsalayev məlumat verib.
Onun sözlərinə görə, şəhidlərin vərəsələrinə birdəfəlik 11 min manat sığorta ödənişi nəzərdə tutulub. Yaralılar üçün olan məbləğ sağlamlığa dəyən zərərdən asılı olacaq. Birinci dərəcəli əlilliyə görə 8800 manat, ikinci dərəcəli əlilliyə görə 6600 manat, üçüncü dərəcəli əlilliyə görə isə 4400 manat məbləğində birdəfəlik müavinət verilir.
Əgər əlillik faktı yoxdursa, veriləcək məbləğ xəsarətin ağırlığına görə təyin edilir. Ağır xəsarətə görə 2750 manat, yüngül xəsarətə görə isə 550 manat ödənilir.
Eyni zamanda noyabrın 7-də Ermənistanla sərhəddə baş verən döyüş əməliyyatları zamanı şəhid olan 7 hərbçinin vərəsələrinə 11 min manat sığorta ödənişi nəzərdə tutulub. Bildirilib ki, vərəsələrin ikisi artıq ödəniş ilə təmin edilib.
Qeyd edək ki, noyabrın 30-da Dövlət Sərhəd Xidmətinin helikopteri qəzaya uğrayıb. Nəticədə 14 nəfər həlak olub, 2 nəfər isə yaralanıb. Hazırda mütəxəssislər hadisənin səbəbini öyrənmək məqsədilə “qara qutu” ilə işləyirlər.
