İçərişəhər ərazisində yaşayan bir qrup sakin oradakı parkinq problemindən şikayətçidir.
Bu barədə Qafqazinfo.az-a Əməkdar artist Mübariz Həmidov müraciət edib. Sumqayıt Dövlət Dram Teatrnın keçmiş direktoru olan sənətçi bildirib ki, İçərişəhərin giriş hissəsi - Vəli Məmmədov küçəsi bina 22 və Neftçilər prospekti 5 B-də avtomobillərini park edə bilmirlər.
Onunla yanaşı adıçəkilən ünvanda yaşayan digər sakinlər də bu vəziyyətdən narahatdır. Sakinlər deyir ki, həmin ərazidə əvvəllər 10-15 maşının parkinqinə icazə verilirdisə, indi bu say 4-5-ə düşüb: “Hamımız bu vəziyyədən narazıyıq. “İçərişəhər” Dövlət Tarix-Memarlıq Qoruğu İdarəsinin sədri dəyişəndən sonra bu halla üzləşdik. Həmin ərazidə yol nişanlanıb, yalnız 4-5 nəfər maşın saxlaya bilir. Onlar da restoranlara gələn müştərilərin və şirkət işçilərinindir”.
Həmçinin qeyd olunub ki, sakinlər avtomobili park etmək istədikdə cərimələnir: “Əməl etməyən vətəndaşlar 2 bal 80 AZN cərimələnir. Qoruq İdarəsi sakinləri nəzərə almadan, İçərişəhərə girişi pullu etməklə, binada yaşayanlar üçün dözülməz vəziyyət yaradır”.
