Bakıda liseydə şagird müəllimini güllələyib - YENİLƏNİB
Bakıda yerləşən "İdrak” liseyində şagird müəllimi güllələyib.
Azxeber.com xəbər verir ki, "İdrak” liseyinin təsisçisi, pedaqoji elmlər doktoru, professor Mönsüm Alışov hadisə ilə bağlı "Yeni Sabah”ın suallarını cavablandırıb.
- Hadisə necə olub?
- Mən gəlmişəm, burdayam. Uşaq çantasında ov tüfəngi gətirib. Ehtiyatsızlıqdan atəş açılıb. Şükür Allaha, elə də ciddi xəsarət yoxdur.
- Neçənci sinif şagirdidir?
- 10-cu sinifdə oxuyur. Oğlan uşağıdır.
- Güllələnən müəllim qadındır yoxsa kişi?
- Qadındır.
- Müəllimin vəziyyəti necədir?
- Müəllimənin vəziyyəti yaxşıdır. Xəstəxanadadır.
- Hansı fənndən dərs deyir?
- Hazırda araşdırma aparılır.
- Əvvəllər bu şagirdlə bağlı şikayət olub?
- Xeyr olmayıb.
- Həmin şagirdin davranışları normaldır?
- Bəli, normaldır.
- Liseyin qapısında mühafizə yoxdur? Necə olub ki, həmin silahı içəri keçirib?
- Var. Ancaq keçirə bilib.
- Hadisə sinif otağında, yoxsa həyətdə baş verib?
- Sinif otağında baş verib.
10:51
Daxili İşlər Nazirliyi "İdrak" liseyində şagirdin müəllimi güllələməsi faktı ilə bağlı məlumat yayıb.
Nazirlikdən İnsanoid.com-a verilən xəbərə görə, fevralın 6-da saat 09 radələrində Binəqədi rayonunda yerləşən özəl "İdrak" liseyinin qarşısında 10-cu sinif şagirdi Ə.Ş insident törədib.
O, atasına məxsus ov silahı ilə məktəbə gələrək orada müəllimə işləyən Ş.K-ya xəsarət yetirib.
Polis əməkdaşları tərəfindən Ə.Ş saxlanılıb. Ondan ov silahı götürülüb.
Faktla bağlı araşdırma aparılır.
Bakıda yerləşən İdrak Liseyində silahlı insident baş verib.
İnsanoid.com-un əldə etdiyi məlumata görə, liseyin müəllimi 10-cu sinif şagirdi tərəfindən güllələnib.
Qeyd edək ki, güllələnən şəxs liseyin riyaziyyat müəllimi olub. Müəllim dərhal Kliniki Tibbi Mərkəzə çatdırılıb. Vəziyyətinin ağır olduğu biildirilir.
Valideynlər hazırda öz övladlarını liseydən götürürlər.
