Azərbaycanda sığınacaqda qalan üç uşaq təhsillə bağlı problem yaşayıb.
İnsanoid.com xəbər verir ki, bu barədə Azərbaycan Uşaqlar Birliyinin sədri Kəmalə Ağazadə paylaşım edib. O bildirib ki, sığınacaqda fərdi təhsilə getməli olan 3 uşağın yerdəyişməsinin edilməməsindən narazıdır.
Kəmalə Ağazadənin sözlərinə görə, bir müddətdir aidiyyəti qurumlar yerdəyişməni edə bilmirlər: “Noyabrın 14-də bununla bağlı paylaşım etmişdim. 17-si dedilər ki, həftənin 1-ci günündən artıq gedəcəklər. Hər gün paltarını axşamdan hazırlayıb bizdən cavab gözləyirdi. 16 yaşlı 3-cü sinfə fərdi təhsil üçün hazırlaşan qızımız depresiv vəziyyətdədir artıq! Kəsib doğrayıb paltarlarını...”
Məsələ ilə bağlı Bakı Şəhər Təhsil İdarəsinə sorğu ünvanladıq.
“Məlumat üçün bildirirəm ki, iş saatı başlayan kimi mənə Bakı Şəhəri üzrə Təhsil İdarəsinin əməkdaşı Bəşarət müəllim zəng edərək bildirdi ki, müraciətimizlə bağlı qərar və tapşırıq artıq 314 nömrəli tam orta ümumtəhsil məktəbinin direktoru Səfa müəllimə verildi. 3 uşaq 1 dekabr 2025-ci il tarixdən müvafiq cədvələ uyğun olaraq fərdi təhsilə gedəcək”, - deyə Kəmalə Ağazadə sosial şəbəkə hesabında yeni paylaşım edərək bildirib.
