Mədəniyyət Nazirliyi 1-10 noyabr tarixlərində Vətən müharibəsində qələbənin birinci ildönümü münasibətilə bir sıra tədbirlər keçirəcək. Bu barədə oktyabrın 28-də Nazirlikdən məlumat verilib.
Tədbirlər çərçivəsində ölkənin aparıcı teatr-konsert müəssisələrində maraqlı konsertlər nəzərdə tutulub.
Proqram siyahısına Heydər Əliyev Sarayında Simfonik Orkestrin, Xor Kapellasının və solistlərin iştirakı ilə Azərbaycan bəstəkarlarının qələbəyə həsr olunmuş “Qarabağ Azərbaycandır!” simfonik konserti daxil edilib. Həmçinin “4.4” qısa tamaşalar festivalı, Beynəlxalq Muğam Mərkəzində “Havalansın Xanın səsi” milli musiqi axşamı və “Jazz says Victory” adlı caz axşamı keçiriləcək. Azərbaycan Dövlət Opera və Balet Teatrının səhnəsində “Cavad xan” baleti də tamaşaçılara nümayiş etdiriləcək.
Vətən Müharibəsindəki Qələbəyə həsr olunmuş bəstəkarlıq müsabiqəsinin qalibləri Zəfər günləri ərəfəsində elan olunacaq.
Tədbirlərə qazi və şəhid ailələri, qazilər, müharibə iştirakçıları dəvət olunacaq.
