Bu gün, yanvarın 12-də Azərbaycanın Müdafiə naziri Zakir Həsənov Azərbaycan ərazisində müvəqqəti yerləşdirilən Rusiya sülhməramlılarının yeni komandanı general-mayor Andrey Volkovu qəbul edib. Bu barədə Müdafiə Nazirliyindən məlumat verilib.
Toplantıda sülhməramlıların müvəqqəti yerləşdirildiyi Qarabağ bölgəsindəki vəziyyət müzakirə olunub. Görüşdə sülhməramlı missiyanın sabiq rəhbəri general-leytenant Rüstəm Muradov da iştirak edib.
Andrey Volkov bu vəzifədə Gennadi Anaşkini əvəz edəcək.
Qeyd edək ki, Andrey Volkov 2020-ci ilin noyabrından 2021-ci ilin mayına kimi sülhməramlı kontingentə rəhbərlik edən general-leytenant Rüstəm Muradovun müavini olub. Hazırda Rusiya Müdafiə Nazirliyinin Cənub hərbi dairəsinin radiasiya, kimyəvi və bioloji müdafiə qoşunlarının rəhbəri vəzifəsini icra edir.
