Tərtər rayonunda 19 yaşlı oğlan həmyerlisinə xəsarət yetirib.
Demokrat.az xəbər verir ki, hadisə 2024-cü ilin avqustun 29-da Tərtər şəhəri, Heydər Əliyev prospektində baş verib. 2007-ci il təvəllüdlü Əmir həmyerlisi Namiqi (adlar şərtidir – red.) küt əşya ilə vurub.
Həmin gün gecə saat 01:00-da Heydər Əliyev prospekti ərazisində həmkəndlisi Vahid ilə birlikdə sonuncunun idarə etdiyi "Mercedes Benz 190" markalı avtomobillə yaşadıqları kəndə qayıdarkən həmin vaxt eyni markalı avtomobil onları təhlükəli formada ötərək keçib.
Tərtər rayon sakini Namiqin də sərnişin qismində əyləşdiyi "Mercedes Benz 190" markalı avtomobilin onları təhlükəli ötmə əməliyyatı etməsi və onları sıxışdıraraq yoldan çıxarması səbəbindən mübahisələri yaranıb.
Bu zaman Əmir Vahidin həmin avtomobilin sürücüsü Elmir, həmçinin avtomobildə sərnişin qismində əyləşmiş Namiq və onun qardaşı Nicatla mübahisə etdiyini görüb, onların mübahisəsinə müdaxilə edib.
Həmin vaxt Namiqin Vahidi döyməsi səbəbindən aralarında mübahisə yaranıb. Namiqin təşəbbüsü ilə baş vermiş mübahisə zamanı onun baş nahiyəsindən qəsdən müəyyən edilməyən küt əşya ilə bir neçə dəfə vuraraq, ona xəsarətlər yetirib.
Əmirin barəsində Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham elan edilib.
İş üzrə ifadə verən Əmir ona elan olunmuş ittiham üzrə özünü təqsirli bilib. O, ifadəsində göstərib ki, hadisə gecə vaxtı olub:
"Biz köhnə avtovağzalda yerləşən mağazaya getmişdik. Mağazadan alış-veriş edərək oradan da dönər yeməyə getdik. Dönər yeyib qayıdan zaman körpünün üstündə olanda tanımadığım avtomobil ötmə əməliyyatı etdi. Ötmə əməliyyatı edən avtomobil bizim üzərimizə gəldi. Həmin vaxt olduğumuz avtomobilin sürücüsü ötən avtomobili saxlatdırdı və ona belə maşın sürməzlər, nəsə ola bilərdi, avtomobildə adam olduğunu dedi. Ötən avtomobilin sürücüsü cavab olaraq "mən belə sürürəm" dedi və üzərimizə gələn zaman bizim avtomobil səkiyə dəydi. Vahid həmin sürücüyə "sən canından bezmisən, mən canımdan bezməmişəm" ifadəsini səsləndirdi".
Əmir qeyd edib ki, daha sonra onun yanında olan şəxslər avtomobildən düşüblər: "Sonra mübahisə yarandı və avtomobildə olan şəxslərdən birini vurdum. Mən avtomobilin yanına gələrək onları aralamaq istəmişdim. Buna baxmayaraq onlar üzərimə hücum çəkdiklərindən dalaşmağa məcbur oldum. Zərərçəkmişi taxta parçası ilə vurmuşam".
Gəncə Ağır Cinayətlər Məhkəməsinin hökmü ilə Cinayət Məcəlləsinin 70.1 və 70.3-cü maddələri tətbiq olunaraq Əmirə 3 il sınaq müddəti olmaqla 3 il şərti cəza verilib.
