2020-ci il sentyabrın 27-də Ermənistan silahlı qüvvələrinin cəbhəboyu törətdiyi genişmiqyaslı təxribatlara cavab olaraq Azərbaycan Ordusu “Dəmir yumruq” adı verilən əks-hücum əməliyyatına başlayıb. 44 gün davam edən Vətən müharibəsi nəticəsində təxminən otuz illik işğala son qoyuldu və ölkəmizin ərazi bütövlüyü bərpa olunub. Müzəffər Ali Baş Komandan İlham Əliyevin rəhbərliyi ilə əldə olunan bu böyük Zəfər, tariximizə qızıl hərflərlə yazılıb.
İnsanoid.com Vətən müharibəsinin xronikasını təqdim edir.
Müharibənin 27-ci günü:
– Azərbaycan Ordusu Xocavənd rayonunun Dolanlar, Bünyadlı, Cəbrayıl rayonunun Dağ Tumas, Nüsüs, Xələfli, Minbaşılı, Veysəlli, Zəngilan rayonunun Vənədli və Mirzəhəsənli kəndlərini işğaldan azad etdi. Bu barədə Prezident İlham Əliyev rəsmi tviter hesabında məlumat yayıb.
– Qubadlı rayonunun Zilanlı, Kürd Mahrızlı, Muğanlı və Alaqurşaq kəndləri də işğaldan azad edildi.
– Prezident İlham Əliyev, Qubadlının azadlığı uğrunda şəhid olan Milli Qəhrəman Şükür Həmidovun atası Nəriman Həmidovla telefonla danışıb.
– Müdafiə Nazirliyinin verdiyi məlumata görə, Azərbaycan Ordusunun əməliyyatları nəticəsində Füzuli, Cəbrayıl və Qubadlı cəbhələrində Ermənistan silahlı qüvvələrinə ciddi zərbələr vurulub, düşmənin dayaq məntəqələri dağıdılıb və mühüm ərazilər azad edilib. Cəbhə boyunca düşmənin əsas ehtiyatları və hərbi infrastrukturu məhv edilib, Ermənistan ordusunun idarəetmə sistemləri iflic olub. Tavuş və Sisian rayonlarından gətirilən erməni qüvvələri döyüşməkdən imtina edərək mövqelərini tərk edirlər.
– Ermənistan ordusuna məxsus iki pilotsuz uçuş aparatı (PUA) zərərsizləşdirilib, digər iki PUA xüsusi texniki vasitələrlə yerə endirilib. Ağcabədi istiqamətində uçuş keçirməyə cəhd edən bir PUA məhv edilib.
– Ermənistanın yaşayış məntəqələrimizə ağır artilleriya və raketlərlə atəş açması nəticəsində sentyabrın 27-dən oktyabrın 23-ü saat 12:00-dək 63 mülki şəxs həlak olub, 298 nəfər yaralanıb, 2156 ev, 90 çoxmənzilli bina və 398 mülki obyekt dağıdılıb. Bu barədə Baş Prokurorluq məlumat yayıb.
– Müdafiə Nazirliyi Ermənistan ordusunun qüvvə və texnikalarının məhv edilməsini əks etdirən videogörüntülər paylaşıb, həmçinin cəbhənin Xocavənd və Füzuli istiqamətlərində düşmənin könüllü dəstələri, artilleriya bölmələri və komanda məntəqələrinin məhv edilməsi barədə görüntülər yayımlayıb.
