Ağdaşda iri və xırdabuynuzlu heyvanlar arasında tələfat qeydə alınıb. Bu barədə Report 7 yanvar tarixində məlumat verib.
Yenicə kəndindən olan Ramin Bəndəliyev təsərrüfatında olan heyvanları örüş sahəsindən qaytardıqdan bir neçə saat sonra onlardan 2 baş qoyunun öldüyünü görüb. Daha sonra fermer digər qoyunların da halsız vəziyyətdə olduğunu müşahidə edib. Fermer sahə baytar həkiminə müraciət edib.
Əraziyə cəlb olunaraq müayinələrə başlayan sahə baytar həkimlərinin ilkin ehtimalına görə, qoyunlar zəhərləniblər.
Bundan sonra digər 100-ə yaxın qoyun və keçiyə də baytar həkimin məsləhəti ilə dərmanlar verilib. Eyni zamanda Ağdaş Rayon Baytarlıq İdarəsi tərəfindən heyvanların saxlanıldığı ferma dezinfeksiya edillib.
Daha sonra Qida Təhlükəsizliyi Agentliyinin nümayəndələri də fermaya gələrək ölmüş heyvanlardan nümunələr götürüblər və Agentliyin laboratoriyasına göndəriblər.
Analizlərin cavabından sonra heyvanların ölümünün dəqiq səbəbləri məlum olacaq.
Ölmüş heyvanlar dezinfeksiya olunaraq basdırılıb. Təsərrüfat sahibinin sözlərinə görə, 2 gün öncə ona məxsus 1 baş camış da eyni şəraitdə ölərək tələf olub.
[caption id="attachment_100637" align="alignnone" width="640"]
Foto Report.az saytı[/caption]
