Aktyor Hikmət Rəhimov mədəniyyət naziri Adil Kərimliyə müraciət edərək, kino şöbəsində çalışan əməkdaşlardan birinin onunla şəxsi ədavət apardığını bildirib.
İnsanoid.com xəbər verir ki, Facebook səhifəsində paylaşım edən aktyor nazirə səslənərək, "Əziz və dəyərli Adil müəllim, yadınızdadırsa, sizinlə görüşdə demişdim ki, nə qədər burada varsınız, sizin rəhbərlik etdiyiniz qurumla bağlı fikir bildirmək istəmirəm. Amma təyin etdiyiniz bəzi adamlar nəinki işini görə bilmir, hətta şəxsi ədavət aparırlar", – deyə qeyd edib.
Rəhimovun sözlərinə görə, kino şöbəsində çalışan Günay Rəhimova adlı əməkdaş onun kino tədbirində iştirakına mane olub. Aktyor bu barədə bildirərək "Martın 10-da Heydər Əliyev Mərkəzində baş tutan kino ilə bağlı tədbirə dəvət olunmuşam, amma bu adam deyib ki, 'Hikmət orada olmamalıdır, çünki mənim onunla ədavətim var'", – deyə vurğulayıb.
O, Mədəniyyət Nazirliyindən heç vaxt pul və ya fəxri ad istəmədiyini bildirərək, "Mən təkbaşına Allahın ətəyindən yapışıb bu yolu gedirəm. Şəxsən, bu ölkənin mədəniyyətinə sizin qurumda çalışan adamlardan daha çox xidmət edirəm və bunu sübut etməyə hazıram", – deyə qeyd edib.
Sonda isə nazirə xitabən "Əziz Adil müəllim, həqiqətən, insan kimi mənim üçün çox dəyərlisiniz və mənə etdiyiniz köməkliyi unutsam, nadan olaram. Amma sizdən xahiş və tələb edirəm ki, bu insanlar sizi pis vəziyyətdə qoymamış, onları yola salın", – deyə müraciət edib.
