2019-2021-ci illər ərzində baş vermiş 5 106 yol qəzasından 2 201-i piyadaların vurulması ilə nəticələnib. APA-nın yaydığı xəbərə görə, bunu iyunun 2-də Baş Dövlət Yol Polisi İdarəsinin polis mayoru İkram Məmmədov bildirib.
Həlak olanların sayı 957, yaralananların sayı isə 1 345 nəfər təşkil edib. Qurumun nümayəndəsi qeyd edib ki, hadisələrin baş verməsinin başlıca səbəbi piyadaların yolu müəyyən olunmayan yerlərdən keçmələridir.
“Avtomagistrallarda yol qəzalarının olmasına şərait yaradan hallardan biri də yükdaşımaların avtomobil nəqliyyatı ilə həyata keçirilməsidir”, - deyə İ. Məmmədov əlavə edib.
Təkcə 3 il ərzində yük avtomobillərinin iştirakı ilə qeydə alınan 419 yol qəzasında 239 nəfər həlak olub, 308 nəfər isə xəsarət alıb.
