Sabunçu rayonunda narkotik vasitələrin satışı ilə məşğul olan və qanunsuz olaraq odlu silah-sursat saxlayan şəxslərə qarşı növbəti əməliyyatlar keçirilib. Bu barədə İnsanoid Daxili İşlər Nazirliyinə istinadən bu gün, 13 fevral tarixində xəbər verir.
Nəticədə qanunsuz dövriyyədən 8 kiloqram narkotik vasitə və 1 ədəd "Kalaşnikov" markalı avtomat silah çıxarılıb.
Paytaxt ərazisində narkokuryerliklə məşğul olan Həmid Həmidzadə saxlanılıb. Onun üzərindən 2 kiloqrama yaxın heroin aşkar edilib. Həmid Həmidzadənin sosial şəbəkələr vasitəsilə tanış olduğu İran vətəndaşının ona pul müqabilində etdiyi narkokuryerlik təklifi ilə razılaşdığı müəyyən edilib.
Keçirilən digər əməliyyat zamanı isə narkotik vasitələrin qanunsuz dövriyyəsi ilə məşğul olan Əliyulla Hadıyev saxlanılıb. Onun üzərindən və evindən 4 kiloqramdan artıq marixuana aşkar edilib.
Sabunçu rayonunda Cavanşir Mövlanzadə adlı şəxsin üzərindən və yaşadığı evdən 2 kiloqrama yaxın heroin, marixuana, "Kalaşnikov" markalı avtomat, 11 ədəd patron və həmin silaha aid patron darağı aşkar edilib.
Faktlarla bağlı araşdırmalar davam etdirilir.
[caption id="attachment_105299" align="alignnone" width="640"]
Foto DİN[/caption]
