İcra sənədləri üzrə ödənişlərin yalnız nağdsız formada icra xidmətinin depozit hesabları vasitəsilə həyata keçirilməsi təklif olunur.
İnsanoid.com xəbər verir ki, bu dəyişiklik "İcra haqqında" Qanuna edilən yeni təklifdə əksini tapıb.
Layihəyə əsasən, icra ödənişləri, məhkəmə qərarlarının icrası ilə bağlı xərclər və digər pul vəsaitləri yalnız nağdsız qaydada ödənilməlidir. Həmçinin, icra xidmətinin depozit hesabına və bu hesabdan köçürmələr zamanı müvafiq icra işinin qeydiyyat nömrəsinin göstərilməsi məcburi olacaq.
Digər dəyişikliyə görə, tələbkar icra xidmətinin depozit hesabından vəsaitin hansı bank hesabına köçürüləcəyini əvvəlcədən bildirməlidir. Əks halda, icra məmuru vəsait daxil olduqdan 3 iş günü ərzində tələbkarı məlumatlandıracaq və vəsait yalnız onun müraciəti əsasında köçürüləcək.
Eyni zamanda, İnzibati Xətalar Məcəlləsinə təklif edilən dəyişikliklə icra ödənişlərinin nağd şəkildə həyata keçirilməsinə görə vəzifəli şəxslərə 500-1000 manat arasında cərimə tətbiq ediləcək.
