Cəlilabad rayonunun fermerləri bildirir ki, kartof əkin sahələrində çürüyür. Bu barədə 28 iyun tarixində Report məlumat verib.
Onların sözlərinə görə, əvvəllər qiymətlər münasib olsa da, son günlər məhsulun qiymətinin aşağı düşməsi onları çətin vəziyyətə salıb: “Məhsulumuz boldur, amma alıcı yoxdur”.
Fermerlər bildirirlər ki, bir neçə həftə əvvəl 1 manata satdıqları faraş kartofun indiki qiyməti 25-30 qəpik civarındadır. Onlar qeyd edir ki, kartofu məcbur dəyər-dəyməzinə satırlar.
"Sahədə qalsa, qurd yeyəcək, həşəratlar daraşacaq. Riskli olsa belə, elə fermer var ki, məhsullarını hələ yığmayıb. Ola bilsin ki, qiymətlər qalxsın. Lakin havalar da isti keçir, kartofun torpağın altında çürümə riski var", - deyə fermer bildirib.
Qeyd olunub ki, Cəlilabad kartofu daha çox Rusiya Federasiyasına ixrac olunur. Hazırda isə Rusiyanın müxtəlif vilayətlərində də kartof yığımının başlaması Cəlilabadda istehsal olunan kartofa tələbatı azaldıb.
