Çexiyada hepatit A epidemiyası sürətlə yayılmağa başlayıb.
Bu barədə “Novinky” xəbər portalı Dövlət Səhiyyə İnstitutuna istinadən məlumat yayıb.
Xəstəlik əvvəlki illərə nisbətən daha sürətlə yayılır. Yanvardan aprelin 28-dək respublikada 424 xəstəlik halı qeydə alınıb. Bu, 2024-cü ilin eyni dövrü ilə müqayisədə on dəfə çoxdur. Hepatit A altı vətəndaşın ölümünə səbəb olub.
Eyni zamanda, həkimlərin sözlərinə görə, xəstəlik əsasən antisanitariya şəraitində yaşayan və gigiyena tələblərinə məhəl qoymayan vətəndaşlar arasında daha geniş yayılıb.
2024-cü ildə ölkədə hepatit A virusuna 636 yoluxma halı qeydə alınıb. Xəstəliyi xüsusilə yaşlı vətəndaşlar və zəif immuniteti olan insanlar ağır keçirir. Həkimlər peyvənd olunmağı və şəxsi gigiyena qaydalarına ciddi riayət etməyi təkidlə tövsiyə edirlər.
Virus yayılarkən dayanıqlıdır. Xəstəliyin inkubasiya dövrü 50 günədək davam edir. Xəstəlik çox vaxt simptomsuz keçir və yalnız analiz nəticələrinə görə aşkar edilə bilər.
