“Agalarov Development” şirkətinin prezidenti, “Crocus Group”un sahibi Araz Ağalarovun oğlu Emin Ağalarov “Crocus City Hall”da törədilən terror aktı nəticəsində şirkətə dəymiş ziyanı açıqlayıb.
İnsanoid.com Rusiya KIV-ə istinadən xəbər verir ki, Ağalarov ziyanı təxmini olaraq 150-200 milyon dollar qiymətləndirib.
"Biznes nöqteyi-nəzərindən bu, bütün “Crocus Group” üçün dağıdıcı təsir oldu, çünki terror aktından sonra ərazidəki bütün obyektlərin fəaliyyəti iflic vəziyyətə düşmüşdü və ziyarətçilərin sayı "azalmışdı”, - "RİA Novosti" onun sözlərindən sitat gətirib.
Ağalarov eyni zamanda vurğulayıb ki, terror aktı ilk növbədə iztirab çəkən və yaxınlarını itirən insanların böyük faciəsidir.
Xatırladaq ki, 22 mart 2024-cü il tarixində Rusiyanın Moskva şəhərindəki "Crocus City Hall"da terror aktı törədilib. Bir neçə silahlı şəxs məkana toplaşan insanlara kütləvi atəş açıb və məkanı yandırmaq üçün yandırıcı vasitələrdən istifadə edib. Hücum 2004-cü ildə Beslanda terror aktından sonra Rusiyada ən qanlı terror aktı olmaqla, ən azı 144 nəfərin ölümü, 360-dan çox insanın yaralanması ilə nəticələnib.
