DİN Salyan rayonunda kəndlərin birində azyaşlının 42 yaşlı kişi tərəfindən qısnanmaya məruz qalması ilə bağlı yayılan iddialara münasibət bildirib. Bu barədə noyabrın 5-də nazirlikdən bildirilib.
Belə ki, oktyabrın 30-da rayon sakini Ə.Q DİN-in "102" xidmətinə zəng edərək 13 yaşlı qızının məktəbdən qayıdan zaman naməlum şəxs tərəfindən qarşısının kəsilməsi və narahat edilməsi barədə məlumat verib.
Keçirilən tədbirlər nəticəsində yeniyetməni narahat edənin rayonun Kərimbəyli kənd sakini, ruhi əsəb xəstəsi olan Mahir Həsənov olması müəyyən edilib.
Sonradan azyaşlının valideyni həmin şəxsi tanıdığından və əsəb xəstəliyindən əziyyət çəkdiyini bildiyindən şikayət və tələbinin olmadığını bildirib.
