Daxili İşlər Nazirliyi Yardımlı rayon sakininin Rayon Polis Şöbəsində fiziki işgəncələrə məruz qaldığı üçün öldüyü iddialarına münasibət bildirib. Bu barədə iyunun 3-də Report məlumat yayıb.
Nazirliyin nümayəndəsi Elşad Hacıyevin sözlərinə əsasən, bəzi sosial şəbəkələrdə müzakirə olunan bu iddialar əsassızdır.
“Narkotiklərin qanunsuz dövriyyəsi ilə məşğul olan Rövşən Əliyev iyunun 1-də saxlanıldıqdan sonra həkimlərin səyinə baxmayaraq, ürək tutmasından vəfat edib”, - deyə o bildirib.
O əlavə edib ki, ölüm faktı ilə bağlı məhkəmə-tibb ekspertizası təyin edilib. Mərhumun yaxın qohumlarının iştirakı ilə meyitə baxış keçirilib: “Meyit üzərində həyat üçün təhlükəli olan hər hansı zədələnmələr müşahidə olunmayıb. Ölən şəxsin meyiti üzərində olan xəsarətlər döyülmə əlaməti deyil”.
Faktla əlaqədar Baş Prokurorluqda cinayət işi başlanılıb.
