“Face ID” (üz tanıma) funksiyası iphone X-ın yaranması ilə təşəkkül tapdı. Üzün tanınma texnologiyası cihazların kilidini açmaq, proqramlara daxil olmaq, satınalmaların doğruluğunu yoxlamaq və s. üçün daha təhlükəsiz və rahat üsul təklif etdi.
“Apple” özü “Face ID” texnologiyasını təqdim edəndə qeyd etmişdi ki, bu sistem "insan üzünün 3D xəritəsini çıxararaq" təhlükəsizlik təmin edir və adi fotolarla aldadılması mümkün deyil. Ancaq eyni genetik koda sahib olan monozigot əkizlərin üz quruluşları demək olar ki, tam eyni olduğu üçün “Face ID” bu fərqi ayırd etməkdə çətinlik çəkə bilər.
Apple bu barədə öz saytında belə qeyd edir:
“Statistik olaraq, “Face ID”nin səhv tanıma ehtimalı 1/1.000.000-dır. Ancaq eyni genetik materiala sahib əkizlər üçün bu ehtimal daha yüksək ola bilər.”
İddialara görə, xüsusən monozigot (eyni yumurta) əkizlər üçün “Face ID” bəzən səhvən tanıma edə bilər.
Texnoloq Elvin Həsənov İnsanoid.com-a verdiyi açıqlamasında deyir ki, əkizlərin bir-birindən genetik və fiziki olaraq fərqliliyi çox minimal olur:
“Müasir smartfonlarda istifadə olunan “Face ID” texnologiyası insan üzünü tanımaq üçün sadəcə kamera görüntüsünə əsaslanmır, eyni zamanda dərinlik sensorları və infraqırmızı (IR) işıq texnologiyalarından da istifadə edir. Bu sistem istifadəçinin üz cizgilərinin 3D modelini yaradır və həmin model əsasında tanıma prosesi həyata keçirilir. Lakin əkizlərin bir-birindən genetik və fiziki olaraq fərqliliyi çox minimal olduğuna görə, “Face ID” texnologiyası bəzən bu iki şəxsi ayırd etməkdə çətinlik çəkə bilər. Çünki əkizlərin üz quruluşları, sümük strukturu, dəri səthindəki konturlar və digər əsas biometrik göstəricilər bir-birinə çox oxşardır. Bu səbəbdən də bəzi hallarda əkizlər bir-birinin smartfonuna “Face ID” ilə giriş əldə edə bilirlər. Bu düşüncə hətta bir sıra testlər və praktiki müşahidələrlə də sübut olunub”.
Onun sözlərinə görə, artıq bu sistem daha da təkmilləşərək mikro mimikaları qeydə alır:
“Təkmilləşdirilmiş “Face ID” sistemləri isə artıq mikro mimikalar, göz ətrafı əzələlərin formalaşması, baxış bucaqları və dəri toxumasındakı cüzi fərqləri analiz etməklə daha dəqiq tanıma təqdim etməyə çalışır. Bununla belə, texnologiya şirkətləri o cümlədən “Apple” öz rəsmi sənədlərində qeyd edirlər ki, əkizlər və çox bənzər ailə üzvləri arasında yanlış tanıma ehtimalı digər istifadəçilərə nisbətən daha yüksəkdir. Bu səbəbdən də yüksək təhlükəsizlik tələb olunan hallarda istifadəçilərə “Face ID” ilə yanaşı əlavə identifikasiya üsullarını- məsələn, şifrə və ya ikili autentifikasiya (2FA) tətbiq etmələri tövsiyə olunur”.
Fidan İlqar
