Antiinhisar və İstehlak Bazarına Nəzarət Dövlət Agentliyi “İstehlakçıların hüquqlarının müdafiəsi haqqında” Qanuna əsasən “Embawood” MMC yə qarşı inzibati xəta protokolu tərtib edib.
Bu barədə Teleqraf.az-a agentlikdən məlumat verilib.
Bildirilib ki, şirkət qüsurlu malın geri qaytarılmasından imtina edib. İstehlakçı ilə bağlanmış müqaviləyə qanunvericiliklə nəzərdə tutulmuş hüquqlarla müqayisədə istehlakçıların hüquqlarını məhdudlaşdıran şərtlər daxil edib.
Xatırladaq ki, bu, MMC haqqında ilin əvvəlindən tətbiq edilən dördüncü protokoldur. Bu ilin aprel və iyununda da şirkət qüsurlu malın geri qaytarılmasından imtina etdiyi üçün cərimələnib.
Qeyd edək ki, İnzibati Xətalar Məcəlləsinin 444.2-ci maddəsinə əsasən, satılmış malların dəyişdirilməsi və ya geri qaytarılması qaydalarının pozulmasına görə 600 manatdan 900 manatadək məbləğdə cərimə nəzərdə tutulub. Məcəllənin 447.0.9-ci maddəsinə əsasən isə, qanunvericilikdə nəzərdə tutulan hüquqlarla müqayisədə istehlakçının hüquqlarını məhdudlaşdıran şərtlərin müqaviləyə daxil edilməsinə görə fiziki şəxslər üç yüz əlli manatdan beş yüz manatadək məbləğdə, vəzifəli şəxslər min beş yüz manatdan iki min manatadək məbləğdə, hüquqi şəxslər dörd min manatdan altı min manatadək məbləğdə cərimə edilirlər.
