Fransa prezidenti Emmanuel Makron Fransa və Böyük Britaniya tərəfindən hazırlanmış Rusiya-Ukrayna münaqişəsinin həlli üçün sülh planını açıqlayıb.
İnsanoid.com xəbər verir ki, bu barədə o, Le Figaro nəşrinə müsahibəsində bildirib.
Təklif olunan plan iki əsas mərhələdən ibarətdir:
1. Bir aylıq qismən atəşkəs rejimi tətbiq olunacaq. Bu müddət ərzində hava və dəniz hücumları dayandırılacaq, lakin quru döyüşləri davam edəcək. Makronun sözlərinə görə, cəbhə xətti boyunca hərbi əməliyyatların tam dayandırılmasını izləmək çətin olduğu üçün bu addım məhdud çərçivədə atəşkəsi nəzərdə tutur.
2. Avropa ölkələrinin sülhməramlı kontingenti Ukraynaya göndərilə bilər. Lakin bu addım yalnız sülh razılaşması əldə edildikdən sonra və daha gec mərhələdə həyata keçiriləcək.
Makron həmçinin Avropa ölkələrinin hərbi büdcələrini artırmalı olduğunu vurğulayıb. Onun sözlərinə görə, Rusiya hazırda ÜDM-in 10%-ni müdafiəyə ayırır, Avropa isə bu göstəricidə hələ də 2%-ə çətinliklə çatır. O, Avropa ölkələrinin ÜDM-in 3-3,5%-ni müdafiə xərclərinə ayırmasının vacibliyini qeyd edib.
Böyük Britaniyanın baş naziri Kir Starmer Fransa və Böyük Britaniyanın Ukrayna ilə birlikdə hərbi əməliyyatların dayandırılması planı üzərində işlədiyini və bu təşəbbüsün daha sonra ABŞ-yə təqdim ediləcəyini bildirib.
2 mart tarixində Londonda Rusiya-Ukrayna münaqişəsinin həlli ilə bağlı beynəlxalq sammit keçirilib. Görüşdə Avropa liderləri, Türkiyə, Kanada və Ukrayna prezidenti Volodimir Zelenski iştirak edib.
Bundan əvvəl, 28 fevralda Vaşinqtonda Zelenski ilə ABŞ prezidenti Donald Tramp arasında fikir ayrılığı yaranıb. Nəticədə Ukrayna liderindən Ağ evi tərk etməsi tələb olunub və planlaşdırılan təbii ehtiyatlarla bağlı sazişin imzalanması ləğv edilib.
