Türkiyənin Hatay əyalətinin Erzin rayonunda zəlzələ nəticəsində bir bina belə uçmayıb. Bu barədə 11 fevral tarixində Report Türkiyə KİV-yə istinadən məlumat verir.
Hatay əyalətinin Erzin rayonunun 42 min əhalisi var. Bu rayon Hatay şəhərindən 110, Osmaniyədən isə 20 kilometrlik məsafədə yerləşir. Zəlzələ nəticəsində bina uçmadığı üçün itki də olmayıb.
Erzin rayon bələdiyyəsinin sədri Ökkeş Elmasoğlu deyib ki, yeraltı təkanlar nəticəsində heç yaralanan da olmayıb: “Erzindən kənarda - İskəndərun, Hatay, Osmaniyədə yaşayan 50-60 sakinimiz hadisə nəticəsində öldü. Ancaq Erzində zəlzələ zamanı ölən və yaralanan olmadı”.
Təbii fəlakətdən zərər görməmələrinin səbəbindən bəhs edən bələdiyyə sədri deyib ki, onun dönəmində rayon ərazisində qanunsuz tikintiyə icazə verməyib: “Bəzən bələdiyyə sədri olaraq mənə hirslə deyirdilər: “Səndən başqa məmləkətdə doğru adam yoxdur? Hətta seçkilərdən sonra uzaq qohumlardan biri yanıma gəlib dedi: “Qanunsuz tikiliyə görə cərimələnmişəm”. Sədr ona yardım edə bilməyəcəyini deyib: “O da mənə hirslə dedi: "Türkiyənin doğru adamı tək sənsən?”.
Bələdiyyə sədri vicdanının rahat olduğunu vurğulayaraq qanunsuz tikiliyə icazə vermədiyini söyləyib.
Bildirilib ki, 1999-cu il avqustun 17-də baş vermiş Gölcük zəlzələsində Kocaeli əyalətinin Dilovası rayonunun Tavşancıl kəndində də dağıntı olmamışdı.
