Son bir ayda ilan sancması ilə bağlı Kliniki Tibbi Mərkəzə 20 nəfər müraciət edib. Bu barədə mayın 31-də mərkəzdən məlumat verilib.
Onlardan 7-sinin vəziyyəti kəskin ağır, digərlərinin vəziyyəti isə orta ağır kimi qiymətləndirilib.
Ötən aylarla müqayisədə ilan sancmalarının artdığını bildirən Mərkəzin şöbə müdiri Azər Maqsudov bildirib ki, ilan sancması zamanı insanların yanlış müdaxilə etməsi zərərçəkənin vəziyyətini daha da ağırlaşdıra bilər: “Yaranı kəsmək, çərtmək, yandırmaq, sarımsaq və ya qatıq kimi vasitələri sürtmək qətiyyən olmaz. İlan dişləyən hissə hərəkətsiz vəziyyətə gətirilməlidir, həmin hissəyə buz qoyulmalıdır və yod məhlulu ilə dezinfeksiya edilməlidir”.
Mütəxəssis sancma zamanı müşahidə olunan ilkin əlamətlər barədə də məlumat verib: “İlan dişlədikdən sonra ilk olaraq ağrı hiss edilir, daha sonra qızartı və şiş əmələ gəlir. Yaranan şiş bədənin bütün funksiyalarının pozulmasına gətirib çıxara bilər. Bu səbəbdən ilan sancması zamanı ilkin yardımı düzgün etmək, sonra isə təcili olaraq xəstəni xəstəxanaya aparmaq lazımdır”.
