Son dövrdə belə fikirlər səslənir ki, kişilər zəifləyib, ailədə də rolları sanki azalıb. Hətta yaşlı insanlar belə deyirlər ki, indiki kişilər ovaxtkı kimi deyil.
Bəs, görəsən, bu nə ilə əlaqəlidir?
Mövzu ilə bağlı Bakuplus.az–a açıqlama verən psixoloq Gülnar Orucovanın sözlərinə görə, əvvəlki uşaqları böyütmək tərzimiz ilə indiki bir deyil:
“Əvvəllər valideynlər uşağın üzərinə məsuliyyət qoyurdu. İndiki valideynlər isə ümumiyyətlə uşaq dünyaya gətirmir. Soruşanda da deyirlər ki, uşağı oxutdurmaq, boya-başa çatdırmaq var. Valideynlər hər şeyi övladlarının əvəzindən edirlər. Sovetlər dönəmində insanlar övlad dünyaya gətirirdilər ki, uşaq ona arxa-dayaq olsun, valideyni daha yaxşı yaşatsın.
Biz öz ailəmizdən də görürdük ki, qızın cehizini qardaşı verib. Oğlan uşaqları həm oxuyub, həm işləyib, həm də ailəsinə dəstək olurdu. Əsil kişi kimi böyüyürdü. Bütün məsuliyyət gəncin üzərində idi. Amma indi valideynlər övladlarına ibtidai sinifdən sürücü tutur. Uşaqlara öz çantasını daşımağa da imkan vermirlər. Bir çantasını daşıya bilməyən uşaq ailəsini də daşıya bilməz”.
G.Orucov qeyd edib ki, indiki bəzi kişilər daha küsəyən olublar:
“Ailə, mühit və yediyimiz qidalar səhhətimizə, hormonal problemlər yaranmasına səbəb olur. Yeniyetmələrin, gənclərin və uşaqların sosial şəbəkədə izlədikləri populyar tiktokerlərdir. Gənclər zənn edirlər ki, avropalaşırlar. Avropalaşmaq bu deyil. İndiki bəzi kişilər daha çox küsəyən, nazlı-qəmzəli olublar. Bu isə heç də yaxşı deyil”.
Psixoloq-seksoloq, Amerika Psixoloqlar Assosiasiyasının üzvü Təhmasib Cavadzadə qeyd edib ki, kişilərin rolunun zəifləməsi dünya miqyasında baş verən haldır:
“Bu həm hormonal, həm də sosial problemdir. Qidalanmanın, yaşayış tərzimizin, sosial mühitdə məlumatların çoxalması da təsir edir. Qadınlar həddindən artıq güclənir. Kişilərin mövqeyini zəiflətmək üçün qadınları gücləndirirlər. Bununla da kişiləri qadınlara tabe edirlər. Cinslər arasında heç bir fərq olmadığını yayırlar. Bunlar təbii ki, rol oynayır. Bir neçə yüz il sonra kişilər çox dəyişəcəklər”.
“Türklərin tarixinə diqqət etsək, görərik ki, qadın və kişi bərabər olub. Avropa və ərəb tarixinə baxanda isə qadınların çox zəif olduğunu görürük. Vikinqlərin tarixində qadınlar da, kişilər də güclü olublar. İndiki dövrdə də qadınlar artıq dərəcədə güclüdürlər. Kişilər zəifləyir. Cinsi rol insanın öz əlində deyil. Kişinin maskulanlıq yoxdursa, deməli homoseksualdır. Homoseksuallar içərisində də həddindən artıq maskulanlığı olan kişi var. Həmin cinsi rol kişilərin seçdiyi peşələrinə də təsir edir. Bu, hormonların düzülüşündən asılıdır. Hormonal balansın tənzimlənməsi, cəmiyyətdə verilən məlumatlar və təbliğlər təsir edir. Bu isə kişilərin incəlməsinə və özlərini daha zərif aparmalarına gətirib çıxarır”, – deyə T.Cavadzadə əlavə edib.
Nəzrin Vahid
