Daha 6 KOB subyektinə “Startap” şəhadətnaməsi verilib. Bu barədə 21 oktyabr tarixində Kiçik və Orta Biznesin İnkişafı Agentliyi məlumat verib.
Məlumata əsasən, bununla “Startap” şəhadətnaməsi almış KOB subyektlərinin sayı 74-ə çatıb.
“Startap” şəhadətnamələri "Macrocode" MMC-nin kodlaşdırmanı asanlaşdıran onlayn platforması, "Krapp" MMC-nin kredit təşkilatları üçün kreditlərin verilməsi prosesini asanlaşdıran mobil tətbiqi, "Metaflix" MMC-nin milli filmlərin onlayn nümayiş platforması, "Monyo" MMC-nin restoranların məlumat bazası və elektron menyu xidməti, "Tutorlab” MMC-nin onlayn təhsil idarəetmə platforması, fərdi sahibkar Tərxan Yusibovun usta və servis xidmətlərinin onlayn platforması üçün təqdim edilib.
Qeyd olunub ki, “Startap” şəhadətnaməsi KOB subyektlərini şəhadətnaməni aldıqları tarixdən etibarən innovasiya fəaliyyətindən əldə etdikləri gəlirlər üzrə mənfəət və gəlir vergisindən 3 il müddətinə azad edir.
Mikro və kiçik sahibkarlıq subyektləri “Startap” şəhadətnaməsi üçün KOBİA-ya müraciət edə bilərlər. Müraciət üçün ərizə forması və lazım olan digər sənədlər və ətraflı məlumatı link-dən əldə etmək olar.
