Mayın 15-də kolleclərə və rezidenturaya qəbul imtahanları keçirilib. Bu barədə Dövlət İmtahan Mərkəzindən məlumat verilib.
İmtahan aşağıdakı kateqoriyalar üzrə keçirilib:
– əvvəlki illərin məzunları üçün 9 illik təhsil bazasında kolleclərə qəbul imtahanı;
– müsabiqədə buraxılış imtahanında verdiyi xarici dildən fərqli dil üzrə iştirak etmək istəyən cari ilin məzunları üçün əlavə xarici dil imtahanı;
– qəbul imtahanını buraxılış imtahanında verdiyi dildən fərqli dil üzrə vermək istəyən cari ilin məzunları üçün əlavə tədris dili imtahanı;
– aprel-may aylarında keçirilmiş buraxılış imtahanlarında müxtəlif səbəblərdən iştirak edə bilməmiş və cari ilin IX sinif şagirdləri üçün buraxılış imtahanı;
– eksternat qaydasında IX sinif üzrə yekun attestasiyada iştirak etmək istəyən şəxslər üçün buraxılış imtahanı;
– buraxılış imtahanlarında müxtəlif səbəblərdən iştirak edə bilməmiş əvvəlki illərin IX sinif məzunları üçün buraxılış imtahanı.
Buraxılış imtahan nəticələrinin 3 həftə ərzində, rezidenturaya qəbul imtahan nəticələrinin isə 3 gün ərzində elan olunması nəzərdə tutulur.
4 nəfərdə mobil telefon aşkarlandığı üçün imtahandan xaric edilib. Bundan əlavə, 1 nəfərin başqasının yerinə imtahana girmək cəhdi müəyyən olunub və qarşısı alınıb.
