Paytaxtın mənzil bazarında qiymətlər "əl yandırır". Şəhərin mərkəzində birotaqlı mənzil almaq üçün külli miqdarda pul xərcləməli və ya ipoteka ilə satın almalısan. Elə ərazilər də var ki, orada ümumiyyətlə, mənzil sahibi olmaq üçün boş ev tapmaq qeyri-mümkündür.
Bəs görəsən, hazırda mənzil bazarında vəziyyət necədir? Yay aylarında dəyişiklik olacaq? Köhnə binaların sökülməsi mənzil bazarına necə təsir edir?
Mövzu ilə bağlı İnsanoid.com-a açıqlama verən əmlak məsələləri üzrə ekspert Ramil Osmanlının sözlərinə görə, hazırda kirayə mənzil bazarında qiymətlərdə ciddi dəyişiklik müşahidə olunmur:
“Qiymətlər daha çox stabildir. Müəyyən ərazilər üzrə şəhərsalma prosesi dərinləşdikcə, söküntü işləri artdıqca bazarda yeni kirayə mənzilə tələb formalaşdıran müəyyən kütlə meydana çıxır ki, bu zaman qiymətlərdə dərhal artımlar müşahidə olunur.
Təbii ki, daha çox müəyyən mədəni kütləvi tədbirlər zamanı kirayə mənzil bazarında qiymət artımları baş verir.
Hazırda belə bir artım müşahidə olunmur. Amma ümumilikdə kirayə mənzil tapmaq özü də ciddi bir problemə çevrilib. Təklif portfelinin də biz zaman -zaman əhəmiyyətli dərəcədə daraldığını müşahidə edirik”.
Ekspert Elnur Fərzəliyev isə qeyd edib ki, qiymətlər daha da artacaq:
“Son 3 ilin statistikasına əsasən, satılan bütün əmlaklar ipoteka ilə verilənlərdir. Eyni zamanda çıxarışlı, ümumi məbləği 200-250 min manata qədər olan evlərə tələbat digər mənzillərdən daha çoxdur. Hazırki vəziyyətdə isə artıq fərdi yaşayış evlərinə və torpaq sahələrinə tələbat artıb. Bu, mövsümlə əlaqəlidir. Hər il mart ayının sonundan avqust ayının sonuna qədər proses belə olur.
Digər tərəfdən yeni tikilən binalara nəzər salsaq, satış qiymətlərində kəskin artım müşahidə olunduğunu söyləyə bilərik. Düşünürəm ki, gələcəkdə tikinti sahələrinin sayı azalsa, inşa ediləcək binalarda mənzil qiymətləri daha kəskin arta bilər”.
Fidan İlqar
