Xaçmaz rayonunun Niyazabad kəndində 15 yaşlı məktəblinin bataqlıqda boğularaq ölməsi ilə nəticələnən hadisə baş verib.
Unikal.az xəbər verir ki, hadisə aprelin 17-də gecə saatlarında, dəniz sahilinə yaxın bataqlıq ərazidə qeydə alınıb. İlkin məlumata görə, Niyazabad kənd sakini Elçin Elman oğlu Bağırov mal-qara axtarışı zamanı at belində olarkən bataqlığa yıxılıb və oradan çıxa bilməyib.
Hadisə şahidlərinin məlumatı əsasında yeniyetmənin axtarışlarına dərhal Fövqəladə Hallar Nazirliyinin Sularda Xilasetmə Xidməti cəlb olunub.
Axtarışlar nəticəsində aprelin 18-i səhər saatlarında Elçin Bağırovun cansız bədəni bataqlıqdan tapılaraq aidiyyəti üzrə təhvil verilib.
Qeyd edək ki, Elçin Bağırov Niyazabad kənd tam orta məktəbinin IX sinfində təhsil alırdı və elə hadisə baş verən gün – aprelin 17-də 15 yaşı tamam olmuşdu.
Faktla bağlı araşdırma aparılır.
