NASA alimləri, Yer üçün potensial təhlükə hesab edilən 2024 YR4 asteroidinin trayektoriyasını və fiziki xüsusiyyətlərini daha dəqiq müəyyənləşdirmək məqsədilə “Ceyms Uebb” kosmik teleskopu vasitəsilə müşahidələr aparacaq.
2024 YR4 asteroidi ilk dəfə 2024-cü ilin dekabrında kəşf edilib. İlkin hesablamalara görə, onun diametri 40-90 metr arasında dəyişir və 2028-ci ildə Yerə yaxınlaşma ehtimalı yüksəkdir. Alimlər asteroidin optik müşahidələr əsasında müəyyən edilən ölçülərinin qeyri-müəyyən olduğunu bildirirlər. “Ceyms Uebb” teleskopunun infraqırmızı diapazonda müşahidə aparmaq imkanları asteroidin istilik emissiyasını analiz etməyə və real ölçülərini daha dəqiq qiymətləndirməyə imkan verəcək.
NASA, Avropa Kosmik Agentliyi (ESA) və Kanada Kosmik Agentliyinin (CSA) birgə həyata keçirdiyi müşahidələr 2025-ci ilin mart ayında planlaşdırılır. Bu dövrdə asteroid teleskop üçün ən əlverişli mövqedə olacaq və analizlərin daha yüksək dəqiqliklə aparılmasına imkan yaradacaq. Araşdırmanın nəticələri 2024 YR4 asteroidinin Yer üçün potensial təhlükəsini qiymətləndirməklə yanaşı, gələcəkdə təhlükəli asteroidlərin izlənilməsi və onların trayektoriyasının dəqiq hesablanması üçün yeni metodların hazırlanmasına töhfə verəcək.
NASA müşahidələrin nəticələri ilə bağlı əlavə məlumatları ictimaiyyətə təqdim edəcəyini bildirib.
