Ölkə üzrə əhalinin sayı ötən ilin əvvəlindən 58 679 nəfər və ya 0,6% artaraq 2022-ci il dekabr ayının 1-i vəziyyətinə 10 215 045 nəfərə çatmışdır. Bu barədə məlumat Dövlət Statistika Komitəsinin 18 yanvar tarixli hesabatında əks olunub.
Əhalinin 52,9%-ini şəhər, 47,1%-ini kənd sakinləri təşkil edib, kişi və qadınların xüsusi çəkiləri isə dəyişməyərək eyni olub.
Ötən ilin yanvar-noyabr aylarında ölkə üzrə 112 758 doğulan körpə qeydə alınmış və 2021-ci ilin müvafiq dövrü ilə müqayisədə əhalinin hər 1 000 nəfərinə bu göstərici 11,1-dən 12,2-yə qədər artıb.
Doğulan uşaqlar arasında oğlanların xüsusi çəkisi 52,8%, qızların xüsusi çəkisi isə 47,2% olub. Doğulan körpələrdən 3 154-ü əkiz, 150-si üçəm, 8-i isə dördəmdir.
2022-ci ilin 11 ayında ölkə üzrə 55 681 ölüm halı qeydə alınmış və 2021-ci ilin müvafiq dövrü ilə müqayisədə əhalinin hər 1 000 nəfərinə ölüm səviyyəsi azalaraq 7,6-dan 6,0-a düşüb.
