Parisdə keçirilən şəhər referendumunda iştirak edənlərin 60%-dən çoxu meriyanın paytaxtın 500 küçəsini piyada zonalarına çevirmək və yaşıllaşdırmaq təşəbbüsünü dəstəkləyib – lakin seçici fəallığı olduqca aşağı olub.
Bu barədə BFMTV məlumat yayıb.
Martın 23-də keçirilən səsvermədə parisililərin 66%-i şəhərin müxtəlif rayonlarında 500 küçənin piyada zonalarına çevrilməsi və yaşıllaşdırılması təşəbbüsünü dəstəkləyib. Həmçinin həmin ərazilərdən avtomobil dayanacaqları da yığışdırılacaq.
Paytaxtda səhər saat 9-dan axşam 19-a qədər 223 seçki məntəqəsi açıq olub.
Lakin seçici fəallığı çox aşağı olub – səsvermə hüququ olan təxminən 1,4 milyon insandan cəmi 54,5 mini, yəni təxminən 4%-i seçki məntəqələrinə gəlib. Le Parisien bildirir ki, son illərdə keçirilən digər şəhər referendumlarında da iştirak səviyyəsi 8%-i keçməyib.
Bu referendum son dövrlərdə Parisdə keçirilən ilk səsvermə olub ki, burada 16 yaşdan etibarən iştirak icazəsi verilib. Mer Ann İdalqo gənclərin belə proseslərə cəlb olunmasını "demokratiyamızın yaşaması üçün vacib” hesab etdiyini bildirib.
Bundan əvvəl Paris Avropada ilk paytaxt olub ki, referendum nəticəsində elektrikli skuterlərin icarəsini qadağan edib. Eyni zamanda, başqa bir referendumun nəticəsinə əsasən, şəhərdə yolsuzluq avtomobilləri üçün parkinq tarifləri artırılıb.
