Xəzər rayonunun Binə qəsəbəsindəki Əli İsazadə küçəsində qanunsuz tikili aşkarlanıb. Bu barədə Report 13 yanvar tarixində məlumat verib.
Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin nümayəndəsi Bəxtiyar Tağıyev bildirib ki, həmin qeyri-yaşayış obyekti müvafiq sənədləri olmadan tikilib:
"Burada ərazi zəbt edilərək yüngül konstruksiyalardan ibarət qeyri-yaşayış obyektinin tikintisinə başlanılıb. Eyni zamanda çoxillik şam ağacları obyektin daxilində qalıb. Məqsədimiz qanunsuz tikinti işlərinin qarşısını almaqla şəhərsalma və tikinti sahəsində qanunvericiliyin, o cümlədən normativ sənədlərin tələblərinə riayət olunmasını və yanğın təhlükəsizliyini təmin etmək, insanların həyatı, sağlamlığı və əmlakı üçün potensial təhlükə yarada biləcək pozuntuları aradan qaldırmaqdır".
B.Tağıyev qeyd edib ki, Şəhərsalma və Tikinti Məcəlləsinin 95-ci maddəsinə uyğun olaraq, həmin obyektin sökülməsi ilə bağlı qərar qəbul edilib və icrası davam etdirilir.
