Nərimanov rayonu və paytaxtın digər ərazilərində evlərdən çoxsaylı oğurluq edən şəxs saxlanılıb. Bu barədə 23 iyun tarixində Daxili İşlər Nazirliyi məlumat verib.
Məlumata əsasən, zərərçəkən şəxs Polis Bölməsinə müraciət edərək evdən 6 500 manat pulun oğurlandığını bildirib. Qeyd olunub ki, Polis Bölməsinə Nərimanov rayonunda yaşayan daha bir neçə sakinin eyni məzmunlu ərizəsi daxil olub. Onlar da evlərindən qızıl-zinət əşyalarının və pul vəsaitlərinin oğurlandığını bildiriblər.
Polis əməkdaşları tərəfindən hadisələri törətməkdə şübhəli bilinən, əvvəllər də oğurluq cinayətləri etdiyi üçün dəfələrlə məhkum olunmuş şəxs saxlanılıb.
Qeyd olunub ki, saxlanılan şəxs Nərimanov rayonu ilə yanaşı, paytaxtın digər ərazilərində də mənzillərdən oğurluqlar etdiyini bildirib.
Faktla bağlı araşdırma aparılır.
