Yanvarın 26-da saat 15:00-da işğaldan azad olunmuş ərazilərə təşkil edilən müntəzəm avtobus reyslərinin fevral ayına olan biletləri satışa çıxarılacaq. Bu barədə 25 yanvar tarixində Rəqəmsal İnkişaf və Nəqliyyat Nazirliyi məlumat verib.
Məlumata görə, sərnişinlər müəyyən olunmuş marşrut xətləri üzrə biletləri www.yolumuzqarabaga.az portalı vasitəsilə onlayn qaydada ala bilərlər. Vətəndaşlar bilet almaq üçün şəxsiyyəti təsdiq edən sənəddəki məlumatları sistemə daxil etməlidirlər. Hər bir bileti yalnız şəxsiyyət vəsiqəsi ilə eyniləşdirilən vətəndaş istifadə edə bilər. Onun başqa şəxsə ötürülməsi mümkün deyil.
İşğaldan azad olunmuş ərazilərə ilk müntəzəm avtobus marşrutları ötən il yanvarın 24-də istifadəyə verilib. Bu günə qədər ümumilikdə 506 reys həyata keçirilib.
