Qazax rayonunda son üç ayda 700 sakin sahibsiz itlərin hücumuna məruz qalıb. Bu barədə 25 oktyabr tarixində APA məlumat verib.
Məlumata əsasən, sonuncu hadisə Qazax şəhərindəki küçələrdən birində baş verib. Gündüz saatlarında küçə ilə hərəkət edən yaşlı qadına sahibsiz itlər hücum edib. Yaxınlıqdakı şəxslər qadını küçə itlərinin əlindən alıblar. Xəsarət alan qadın xəstəxanaya yerləşdirilib və ona tibbi yardım göstərilib.
Sakinlərin sözlərinə görə, Qazax rayonunda sahibsiz itlərin sayı günbəgün artmaqdadır. Son zamanlar it dişləməsi faktları da çoxalıb.
Sakinlər sahibsiz itlərin artmasının səbəbi kimi rayon ərazisində məişət tullantıları qablarının azlığını göstərirlər. Belə ki, müxtəlif ərazilərdə toplanan tullantılar həm də itlərin yem mənbəyi rolunu oynayır, nəticədə sahibsiz itlər parklarda, bağlarda kütləvi şəkildə artaraq təhlükə mənbəyinə çevrilir.
