Şamaxıda uşağa qarşı zorakılığa görə bağça müdiri və aşpaz cəzalandırılıb. Bu barədə Report iyunun 9-da məlumat verib.
Şamaxı şəhərinin 3 saylı uşaq bağçasında iyunun 2-də uşaqlardan birinin ad gününün qeyd edilməsi zamanı aşpaz Sevinc Balkiyeva otağa tort gətirib. Daha sonra o, torta yaxınlaşan 5 yaşlı qızın saçından tutaraq dartıb. Bu haqda sosial şəbəkədə videogörüntülər yayılıb. Məsələ ilə bağlı Təhsil Nazirliyinin nümayəndələri araşdırma aparıb.
Aşpaz sonuncu xəbərdarlıqla şiddətli töhmət alıb. O, hadisənin istəmədən baş verdiyini və buna görə üzr istədiyini söyləyib. Həmçinin bağçanın müdirinə əmək funksiyasını yerinə yetirərkən yol verdiyi nöqsanlara görə xəbərdarlıq edilib.
Azyaşlının valideyni isə heç kimdən şikayəti olmadığını deyib.
