Şəmkir rayonunda yerləşən “Azərşəkər” MMC-nin aqroparkında və “Şəmkir Aqropark”da 200 nəfər işlə təmin edilib. Bu barədə 24 iyun tarixində İqtisadiyyat Nazirliyinin rəsmi səhifəsində məlumat verilib.
Məlumata əsasən, “Azərşəkər” MMC-nin aqroparkı Ceyrançöl ərazisində yerləşir. Ümumi sahəsi 4 min hektar olan aqroparkda taxıl, şəkər çuğunduru, dən qarğıdalısı və soya əkilib. Aqroparkın investisiya dəyəri 13,4 milyon manatdır. Burada 71 daimi, 30 isə mövsümi iş yeri yaradılıb.
İnvestisiya dəyəri 62 milyon manat olan “Şəmkir Aqropark”ın ərazisi 559 hektardır. Burada 24 min ton tutumu olan 64 ədəd soyuducu saxlama kamerası quraşdırılıb. Ərazidə, həmçinin 200 ton məhsul qəbul edə biləcək 2 terminal, 120 ton hazır məhsulu yola sala bilən 1 terminal fəaliyyət göstərir. Aqroparkda 100 nəfər işlə təmin edilib.
