Şəmkirdə hamilə arvadını və qızını öldürən şəxsin cinayət işi məhkəməyə göndərilib. Bu barədə 30 iyun tarixində Report məlumat verib.
Məlumata əsasən, cari ilin fevral ayında Şəmkir rayonunun Çinarlı kəndi ərazisində qadın və onun azyaşlı qızının qəsdən öldürülmələri faktı üzrə Cinayət Məcəlləsinin müvafiq maddələri ilə rayon prokurorluğunda başlanmış cinayət işinin ibtidai istintaqı tamamlanıb.
Bildirilib ki, qətlləri törətməkdə təqsirləndirilən şəxs evdə çarpayıda yatmış hamilə arvadına bıçaqla çoxsaylı xəsarətlər yetirərək öldürdükdən sonra sonuncunun yanında olan azyaşlı qızının ona mane olmasından hiddətlənərək həmin bıçaqla çoxsaylı xəsarətlər yetirərək qızını da qəsdən öldürüb.
Şubhəli bilinən şəxs barəsində “xüsusi amansızlıqla və ya ümumi təhlükəli üsulla adam öldürmə”, “iki və ya daha çox şəxsi öldürmə”, ”təqsirkar şəxs üçün aşkar surətdə hamilə vəziyyətində olan qadını öldürmə” və “təqsirkar şəxs üçün aşkar surətdə köməksiz vəziyyətdə olan adamı öldürmə” maddələrilə məhkəmənin qərarına əsasən, həbs qətimkan tədbiri seçilib.
