Şəmkirdə qətl törədərək hadisə yerindən qaçan şəxs tutulub. Bu barədə oktyabrın 24-də DİN-dən məlumat verilib.
Oktyabrın 22-də saat 14 radələrində Seyfəli kəndindəki bir evdən Ruslan Bayramovun meyiti tapılmışdı. Araşdırmalarla rayonun Çinarlı qəsəbə sakini, əvvəllər məhkum olunmuş Mustafa Eyubovun tüfəngdən açdığı atəşlə R.Bayramovu öldürməsinə əsaslı şübhələr müəyyən olunub.
M.Eyubov Sabunçu rayonunun Kürdəxanı qəsəbəsi ərazisində tutularaq istintaqa təhvil verilib.
Çinarlı qəsəbəsindəki evə baxış zamanı onun cinayəti törədərkən istifadə etdiyi R.Bayramova məxsus “TOZ-16” markalı ov tüfəngi və 29 ədəd patron aşkar olunaraq götürülüb.
Faktla bağlı cinayət işi başlanılıb.
