“Mənim ölmədən öncə həyata keçirmək istədiyim arzularım var. Bu da onlardan biri idi”
Bu sözləri İnsanoid.com-a Şimal Buzlu okeanına səyahət edən şirniyyatçı Gülanə Quliyeva deyib.
Onunla müsahibəni təqdim edirik:
- Gülanə xanım, öncə oxucularımız üçün özünüzü təqdim edərdiniz.
- Gülanə Yusif qızı Quliyeva. 1995-ci ildə Ağcabədi rayonunda anadan olmuşam. Şirniyyatçıyam, neçə illərdir müxtəlif növ tortlar hazırlayıram.
- Bu sahəyə marağınız necə yarandı? Neçə ildir ki, bu fəaliyyətlə məşğulsunuz?
- Uşaqlıqdan şirniyyat hazırlamağa marağım olub. Özümü dərk edəndə əl bacarığımla aksesuarlar düzəldirəm. Amma son 5 ildir ki, tortlar hazırlayıb, satıram. Əkiz övladlarım dünyaya gəldiyi üçün evdən necə işləyə biləcəyimi düşünürdüm. Həvəsim olduğu üçün tort hazırlanması üzrə kurslara qoşuldum. Bir həvəslə başladığım yolda öz biznesimi yaratdım.
- Son günlər sosial şəbəkələrdə izləyicilər tərəfindən sizin Şimal Buzlu Okeanına səyahətiniz çox maraqla qarşılanıb. Maraqlıdır, bu səfər barədə necə qərar qəbul etdiniz?
- Mənim ölmədən öncə həyata keçirmək istədiyim arzularım var. 30 yaşımda özümə nə hədiyyə edə biləcəyimi düşünürdüm. İstəyirdim ki, arzularımdan birini həyata keçirim. Rusiyada yaşayan dayım qızı ilə danışarkən bu fikrimi dedim. O da Qütb İşıqlarını görməyi təklif etdi. Beləcə, bizim Şimal Buzlu Okeanına səyahətimiz başladı.
- Səyahətə hazırlıq prosesində necə keçdi?
- Öncə araşdırdıq ki, Qütb İşıqlarını Laplandiya və Murmanskda görmək mümkündür. Laplandiya uzaq olduğu və viza tələb etdiyi üçün Murmanska getməyə qərar verib, hazırlıqlara başladıq. Bildiyiniz, kimi Qütb Parıltısını görmək şans məsələsidir. Səyahət zamanı gedəcəyimiz yerlərin siyahısını tutduq.
- Şimal Buzlu okeanında qarşılaşdığınız ən ekstremal hava şəraiti və təbiət hadisəsi nə oldu?
- Səfərimiz zamanı hava çox dumanlı idi. Bizimlə birlikdə bir neçə tur getmişdi. Lakin yalnız bizim turda olanlar Qütb İşıqlarını gördülər. Çünki tur rəhbərimiz çox yaxşı idi. Ən qəribəsi isə odur ki, Qütb Parıltısı fotokamerada görünürdü, videokamerada yox. Adi gözlə baxanda belə, fotokameradakı kimi görünmürdü.
Sadəcə qorxduğum üçün ən axırıncı suya girən mən oldum. Geyindiyimiz kostyum soyuğu keçirmədiyi üçün heç üşümədik.
- Şimal buzlu okeanına gedərkən ən maraqlı anınız hansı idi?
- Tur paketlərinə baxanda dayım qızının “okeanı qucaqlamaq” arzusu var idi. Həmin o məşhurlaşan videoda göründüyü kimi. Elə səyahətimizin ilk günü və maraqlı anı “okeanı qucaqlamaq” oldu. İki saat okeanda olduq.
- Bu təcrübəni başqalarına məsləhət görərdinizmi? Hər hansı bir tövsiyə və ya xəbərdarlıq etmək istəyərdiniz?
- Əlbəttə, hər kəsə gedib gəzməyi, xarici ölkələrdə olmağı məsləhət görürəm. Bir qərar almışıq ki, Şimal Buzlu Okeanına səyahət təşkil edək. Bizim kimi gedib görmək istəyənlər varsa, onlara kömək olaq.
Fidan İlqar
