Daha bir yanğın təhlükəli obyektin fəaliyyəti dayandırılıb. Bu barədə İnsanoid Fövqəladə Hallar Nazirliyinə istinadən bu gün, 7 yanvar tarixində məlumat verir.
Dövlət Yanğın Nəzarəti Xidməti paytaxtın Səbail rayonunun Qoqol küçəsi, 3A ünvanında yerləşən “Təndir-Məndir” restoranında çoxsaylı nöqsanlar aşkarlayıb. Onların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib.
Belə ki:
- obyektin istismarı Dövlət Yanğın Nəzarəti Xidməti ilə razılaşdırılmayıb;
- obyektdə avtomatik yanğın xəbərverici siqnalizasiya qurğuları quraşdırılmayıb;
- yanğın və ya digər fövqəladə hadisələr zamanı insanların köçürülməsi üçün ehtiyat təxliyə yolu nəzərdə tutulmayıb, habelə obyekt insanların köçürülməsinə (təxliyə olunmasına) kömək edən qurğularla təmin olunmayıb;
- elektrik təchizatı və elektrik qurğuları müvafiq qaydaların və normativ sənədlərin tələblərinə uyğun quraşdırılmayıb, o cümlədən yanğın təhlükəsi törədən keçirici müqavimətin əmələ gəlməməsi üçün kabel və naqillərin birləşmə sahələri və sonluqları xüsusi sıxaclarla və ya qaynaq yolu ilə bərkidilməyib, obyektin daxilinə çəkilmiş elektrik xətlərinin izolyasiyasının gərginliyə qarşı müqaviməti yoxlanılmayıb;
- obyektdə yanğın təhlükəsizliyinin təmin edilməsi üçün əmrlə (təlimat) yanğına qarşı rejim müəyyənləşdirilməyib.
Beləliklə, mövcud vəziyyət onu göstərir ki, obyektin istismarının davam etdirilməsi nəticəsində orada hər an baş verə biləcək yanğın qısa müddətdə genişlənərək faciəni qaçılmaz edəcək.
Aşkarlanan nöqsanlar nəzərə alınaraq, “Təndir-Məndir” restoranının fəaliyyətinin dayandırılması barədə Qərar qəbul olunub.
