Tesla 2025-ci ilin birinci rübündə 336 min 681 ədəd elektromobil satıb. Şirkətin satışları 2022-ci ilin ikinci rübündən bəri ən aşağı səviyyəyə düşüb.
İnsanoid.com şirkətin açıqlamasına istinadən xəbər verir ki, Tesla 2025-ci ilin ilk 3 ayında 336 min 681 ədəd nəqliyyat vasitəsi (elektromobil) tədarük etdiyini bildirib. Bu rəqəm 2022-ci ilin ikinci rübündən bəri ən pis göstəricidir. Bloomberg-in hesablamalarına görə, analitiklər şirkətin orta hesabla 390 min ədəddən çox elektromobil satacağını gözləyirdilər.
Avropada ilin ilk iki ayında Tesla satışları 43 faiz azalıb.
BYD Co-nun daha da önə keçdiyi Çində də Tesla-nın satışları azalıb. Birinci rübdə BYD, akkumulyatorlu-elektrik və plug-in- hibrid avtomobillərinin satışını 58 faiz artırıb.
Tesla birinci rübdə 323 min 800 ədəd Model Y və Model 3 avtomobili tədarük edib ki, bu da bir il əvvəllə müqayisədə 12 faiz azdır. Cybertruck, Model S və X daxil olmaqla, bütün digər elektromobillərin satışları 24 faiz azalaraq cəmi 12 min 881 ədəd olub.
Şirkət hələlik konkret Cybertruck satışlarını açıqlamasa da, son geri çağırış Tesla-nın ABŞ bazarında 46 mindən bir qədər çox Cybertruck satdığını göstərib.
