Türkiyənin İstanbul şəhərində, çemodanın içində meyiti tapılan 22 yaşlı universitet tələbəsi Aişə Tokyaz cinayəti ilə bağlı sarsıdıcı detallar ortaya çıxıb.
Aişə Tokyaz, Hatay şəhərindən İstanbula təhsil almağa gəlib və İşıq Universitetinin Tibb bacısı fakültəsinin son kurs tələbəsi olub. O, sosial media vasitəsilə tanış olduğu 38 yaşlı keçmiş polis əməkdaşı Cəmil Qoç ilə münasibət qurub. 2024-cü ildə narkotik və silah ticarəti səbəbilə vəzifədən uzaqlaşdırılan Qoç, Aişəyə evlilik təklifi etsə də, qız yaş fərqini əsas gətirərək bu təklifdən imtina edib.
Aişənin əkiz bacısı Əsra Tokyazın dediyinə görə, Qoç onu və ailəsini razı salmağa çalışıb və "son dəfə danışmaq" bəhanəsi ilə Aişəni evinə dəvət edib. Gənc qız oraya getdikdən sonra zorla saxlanılıb.
13 iyul 2025-ci il, bazar günü, İstanbulun Eyüpsultan rayonunda çemodanın içində, üzərində paltarı olmayan bir qadın meyiti aşkar edilib. Polisin apardığı araşdırmalar nəticəsində həmin şəxsin Aişə Tokyaz olduğu müəyyən edilib.
Araşdırmalar zamanı məlum olub ki, Aişə Cəmil Qoç tərəfindən döyülərək öldürülüb, daha sonra meyiti çemodana yerləşdirilib. Qoç və başqa bir şəxs çemodanı evdən çıxararaq avtomobilə yerləşdirib. Qeydiyyat Nişanı Tanıma Sistemi (QNTS) vasitəsilə təqib edilən avtomobilin Qoç tərəfindən idarə olunduğu və çemodanın yol kənarına atıldığı müəyyən olunub.
Cəmil Qoçun bir taksi sürücüsünə meyiti daşıması üçün 500 min lirə (20 min manatdan çox) təklif etdiyi, nəticədə isə meyiti başqa bir avtomobilə yüklətdiyi müəyyən olunub.
Cəmil Qoç və ona yardım edən 6 nəfər saxlanılaraq dindirilib. Qoçun ifadəsində cinayəti etiraf etdiyi, Aişənin bacısı Əsra Tokyazın isə dəfələrlə polisə müraciət etdiyi halda nəticə əldə edə bilmədiyi bildirilir.
Cinayətlə bağlı təhlükəsizlik kamerası görüntüləri yayılıb. Kadrlarda Ayşənin Qoçla birlikdə Küçükçekmecedəki evə daxil olması və çemodanın evdən necə çıxarıldığı əks olunub.
Üstəlik, Cəmil Qoçun adı 2023-cü ildə Türkmənistan vətəndaşı Ece Gül Övezovanın Diyarbəkirdə yaşadığı binanın 6-cı mərtəbəsindən yıxılaraq şübhəli şəkildə ölməsi hadisəsində də keçib. Lakin sübut çatışmazlığı səbəbilə azadlığa buraxılıb.
Bundan əlavə, Cəmil Qoçun qardaşının da FETÖ istintaqı çərçivəsində polislikdən xaric edildiyi məlum olub.
