Ötən gün Ağcabədidə baş verən qəza zamanı 65 yaşlı sürücü ağır xəsarət alıb.
“Qafqazinfo” xəbər verir ki, Munis İbrahimov idarə etdiyi “VAZ 2106” markalı 02 BZ 936 dövlət nömrəli avtomobillə hərəkətdə olarkən idarəetməni itirərək yol kənarındakı beton səddə və küçəni işıqlandıran işıq dirəyinə çırpılıb.
Nəticədə sürücü M.İbrahimov müxtəlif dərəcəli xəsarətlər alaraq Ağcabədi Rayon Mərkəzi Xəstəxanasına çatdırılıb. Faktla bağlı araşdırma başlanıb.
TƏBİB-dən bildirilib ki, saat 11:30 radələrində Ağcabədi rayonunda baş verən yol-nəqliyyat hadisəsi səbəbilə xəsarət alan 1960-cı il təvəllüdlü (kişi) şəxs Ağcabədi Rayon Mərkəzi Xəstəxanasına hospitalizasiya olunub.
Qeyd edilib ki, kəllə sümüklərinin yerdəyişən sınığı, çənə və alın dibində hematoma, başın sıyrılmış açıq yarası diaqnozu təyin edilən yaralıya ilkin tibbi yardım göstərilib və Reanimasiya şöbəsinə yerləşdirilib.
Hazırda pasiyentin vəziyyəti ağır qiymətləndirilir.
***
Hadisə ilə bağlı Baş Dövlət Yol Polisi İdarəsindən bildirilib ki, aparılan maarifləndirmə işlərinə baxmayaraq, hələ də səhhətində problemlər olduğunu bildiyi halda sükan arxasına əyləşən sürücülərə rast gəlinir.
Ötən gün saat 12:30 radələrində Ağcabədi şəhəri Üzeyir Hacıbəyli prospektində rayon sakini Munis İbrahimovun idarə etdiyi “VAZ” markalı avtomobil qəflətən qarşıdan gələn nəqliyyatın hərəkət zolağına çıxıb və yol kənarındakı maneələrə çırpılıb. Qəza nəticəsində sürücü ağır xəsarətlə xəstəxanaya yerləşdirilib.
Yaxınlarının və şahidlərin bildirdiyinə görə, hadisəyə səbəb ürək xəstəliyindən əziyyət çəkən M.İbrahimovun isti havada avtomobil idarə edərkən qəflətən halının pisləşməsi olub.
Baş Dövlət Yol Polisi İdarəsi bir daha səhhətində ciddi problemlər olan sürücülərə müraciət edərək onları yaşanmış acı təcrübələrdən düzgün nəticə çıxarmağa, özlərinin və digər yol hərəkət iştirakçılarının həyat və sağlamlığına biganə yanaşmamağa çağırır.
