Uşaqlar üçün oyun və əyləncə mərkəzlərinin layihələndirilməsi zamanı bütün təhlükəsizlik tədbirləri nəzərə alınmalıdır. Bu barədə iyunun 14-də təhlükəsizlik məsələləri üzrə ekspert Elmar Nurəliyev Trend-ə danışıb.
“Belə məkanların döşəmə hissəsi sürüşkən, qığılcım yaratmayan materiallardan olmalı, tavan hissəsi yanmayan, arakəsmə divarlar və qapılar isə yanmaya davamlı olmalıdır”, - deyə o söyləyib.
Ekspert bildirib ki, uşaqlar üçün nəzərdə tutulan attraksionlar və digər qurğular tez alışan materiallardan hazırlanmamalıdır.
“Əyləncə mərkəzlərinin havalandırma, yanğın təhlükəsizliyi sistemi, nəzarət müşahidə kameraları, ehtiyat çıxışı, ehtiyat işıq generatorları və ehtiyat su çəni olmalıdır”, - E.Nurəliyev əlavə edib.
Həmçinin, ekspert tərəfindən əyləncə mərkəzlərində çalışan işçilərin yanğın və digər xoşagəlməz hallarda davranış qaydalarını bilməli olduqları xüsusi vurğulanıb.
