Xaçmazda gilasın kütləvi yığımına başlanılıb. Yığılan məhsul ölkəmizlə yanaşı, Rusiya bazarlarına da göndərilir. Bu barədə iyunun 10-da Azərtac reportaj hazırlayıb.
Məlumatda deyilir ki, hazırda gilasın bir kiloqramı 4 manatadır.
Sabiroba kəndindən olan təsərrüfatçı Nurlan Qurbanov bildirir ki, məhsuldarlıq ötən illərə nisbətən zəif olsa da, qiymət onları qane edir.
“Gilas bizdən alındıqdan sonra bir neçə gün rayon ərazisindəki soyuducu anbarlarda saxlanılır. Burada yuyulub, müəyyən temperatura kimi soyudulduqdan sonra yük maşınları ilə Rusiyanın müxtəlif bölgələrindəki bazarlara yola salınır. İyun ayının sonuna kimi məhsul yığımı davam edəcək”, - deyə o məlumat verib.
Sözügedən rayonda gilasın “Krım”, “Romanovka”, “Öküzürəyi”, “Napoleon” və başqa növləri yetişdirilir. Yeni salınan bağlar, əsasən, intensiv üsulla becərilir.
[URIS id=52923]
